سکردو (سپورٹس نیوز)پشاور سے اسکردو 800 کلومیٹر نان اسٹاپ دوڑ لگا کر نوجوان ایتھلیٹ مسعود خان نے عالمی ریکارڈ اپنے نام کر لیا۔
مسعود خان نے پشاور سے اسکردو تک کا طویل اور دشوار گزار راستہ بغیر رکے کامیابی سے طے کرکے یہ غیر معمولی چیلنج مکمل کیا۔ نوجوان نے قراقرم ہائی وے کے دشوار گزار پہاڑی راستوں، دریائے سندھ کے دلکش مناظر اور گلگت بلتستان کی وادیوں کو عبور کیا۔مسعود خان نے پاکستان میں روس، جاپان اور چین سمیت متعدد ممالک کے ایتھلیٹس کے ساتھ مقابلہ کر کے بے شمار تمغے اپنے نام کیے۔نوجوان ایتھلیٹ مسعود خان نے کہاکہ آج پاکستان کا نام دنیا بھر میں روشن کیا، پشاور سے اسکردو تک طویل دوڑ ایک انوکھا اور اپنی نوعیت کا پہلا کارنامہ ہے۔
انہوںنے کہاکہ انتہائی مشکلات کے باوجود 810 کلومیٹر کا یہ عالمی ریکارڈ صرف 9 دن میں مکمل کیا۔نوجوان ایتھلیٹ مسعود خان نے کہا کہ مسلسل دوڑ کی وجہ سے قدم ڈگمگائے، لیکن پاکستان اور اپنی قوم کی خاطر کبھی ہمت نہیں ہاری، 800 کلومیٹر کا ہدف پورا ہونا میرے اور پورے ملک کے لیے باعثِ فخر ہے۔انہوںنے کہاکہ یہ کارنامہ پاکستان کے نوجوان کھلاڑیوں کی صلاحیتوں اور عالمی سطح پر ملک کے مثبت تشخص کو اجاگر کرنے میں ایک اہم پیش رفت سمجھا جا رہا ہے۔
