اسلام آباد(نیوز ڈیسک) سابق وفاقی وزیر فواد چوہدری نے صحافی صالح ظافر کو سرکاری اعزاز دیئے جانے پر تنقید کرتے ہوئے کہا ہے کہ اگر صالح ظافر کو تمغہ دیا گیا ہے تو پنکی کو بھی دے دیتے، ایوانِ صدر میں تمغوں کا امتیاز اسٹور کھل گیا ہے۔ تفصیلات کے مطابق فواد چوہدری نے سماجی رابطے کی ویب سائٹ ایکس پر اپنے بیان میں سرکاری اعزازات کی تقسیم کے معاملے پر سخت ردعمل کا اظہار کیا، انہوں نے کہا کہ انہیں انتہائی معذرت کے ساتھ کہنا پڑتا ہے کہ وزیراعظم شہباز شریف کی جانب سے صالح ظافر کو ان سے متعلق مبینہ طور پر انتہائی نامناسب خبریں شائع کرنے کے باوجود ایوارڈ دیا جانا ان کے نزدیک انتہائی قابل اعتراض اقدام ہے۔
سابق وفاقی وزیر نے اپنی پوسٹ میں کہا کہ سرکاری اعزازات کی تقسیم میں میرٹ اور معیار کو مدنظر رکھا جانا چاہیے، تاہم موجودہ صورتحال میں ایسا محسوس ہوتا ہے جیسے اعزازات کی تقسیم کے حوالے سے امتیاز اسٹور کھول دیا گیا ہو، ایسے میں اگر صالح ظافر کو تمغہ دیا گیا ہے تو پھر پنکی کو بھی دے دیتے۔فواد چوہدری نے اپنے بیان میں پنجاب اور پنجابی زبان و ادب کے حوالے سے بھی تفصیلی شکوہ کیا، ان کا کہنا تھا کہ ملک میں پنجابیوں اور پنجابی زبان سے مبینہ بغض کی صورتحال یہ ہے کہ مختلف شعبوں میں ایسے افراد کو بھی ایوارڈ دیئے گئے جنہیں وہ چمچے کڑچھے قرار دیتے ہیں، جبکہ پنجابی ادب کے لیے سرکاری اعزاز نہ ہونے پر انہوں نے سوال اٹھایا۔
انہوں نے کہا کہ اگر کسی شعبے میں ایوارڈ موجود نہیں تو وہ پنجابی ادب کے لیے نہیں ہے، اگر کوئی شخص پنجاب کے حقوق کی بات کرے تو اسے مختلف سمتوں سے مخالفت اور تنقید کا سامنا کرنا پڑتا ہے۔فواد چوہدری نے پنجابی زبان کے حوالے سے بھی افسوس کا اظہار کرتے ہوئے کہا کہ پنجابی خود اپنی زبان کو 1947 میں ہی دفن کرکے خوش ہیں، انہوں نے پنجابی ادبی حلقوں سے اپیل کی کہ انہیں اس معاملے پر آواز اٹھانی چاہیے اور پنجابی ادب و زبان کے لیے سرکاری سطح پر مناسب نمائندگی اور اعزازات کے مطالبے کو سامنے لانا چاہیے۔
