کراچی(کرائم رپورٹر)کراچی میں منشیات ڈیلر انمول عرف پنکی کے خلاف شواہد کی فرانزک کے حوالے سے پیش رفت سامنے آئی ہے۔ جوڈیشل مجسٹریٹ جنوبی کی عدالت میں ڈرگ ڈیلر انمول عرف پنکی کے خلاف منشیات سمیت دیگر مقدمات کی سماعت کے دوران پولیس نے ملزمہ سے متعلق ڈیجیٹل شواہد کی فرانزک جانچ کے لئے درخواست دی ہے۔
پولیس کی جانب سے عدالت میں درخواست دائر کی گئی ہے، جس میں استدعا کی گئی ہے کہ ملزمہ کی وائس ریکارڈنگ، وائس میسجز، کال ریکارڈنگ اور دیگر ڈیجیٹل شواہد فرانزک تجزیے کےلئے پنجاب لیبارٹری بھجوانے کا حکم دیا جائے۔درخواست میں مقف اختیار کیا گیا ہے کہ تفتیش کے دوران ملزمہ سے متعلق مختلف ڈیجیٹل شواہد حاصل ہوئے ہیں جن میں وائس ریکارڈنگ، وائس میسجز اور کال ریکارڈنگ شامل ہیں۔
پولیس کے مطابق دورانِ تفتیش ملزمہ نے ان ریکارڈنگز اور میسجز کو اپنا تسلیم کرنے سے انکار کیا ہے۔ ملزمہ کا موقف ہے کہ وائس میسجز اور ریکارڈنگ میں موجود آواز اس کی نہیں ہے، اسلئے تمام ڈیجیٹل شواہد کو پنجاب لیبارٹری بھجوا کر فرانزک تجزیہ کرایا جانا ضروری ہے۔درخواست میں عدالت سے استدعا کی گئی ہے کہ تمام ڈیجیٹل شواہد کی فرانزک جانچ پنجاب لیبارٹری سے کرانے کا حکم دیا جائے تاکہ سائنسی بنیادوں پر شواہد کا جائزہ لیا جا سکے۔پولیس کے مطابق فرانزک رپورٹ سے یہ تصدیق ہو سکے گی کہ مذکورہ وائس ریکارڈنگ، وائس میسجز اور کال ریکارڈنگ میں موجود آواز ملزمہ کی ہے یا نہیں۔
