پیرس (نیوز ڈیسک )فرانس کی وزیر دفاع الیس روفو نے اعلان کیا ہے کہ طیارہ بردار بحری جہاز شارل ڈیگول اور اس کے ساتھ چلنے والے بحری جہاز جزیرہ نما عرب کے ساحلوں کے سامنے کے علاقے میں پہنچ گئے ہیں جہاں وہ آبنائے ہرمز میں جہاز رانی کی آمد و رفت کو بحال کرنے کے مقصد سے ایک غیر جانبدار مشن شروع کرنے کے امکان کی تیاری کے لیے تعینات ہوں گے۔وزیر دفاع نے ایک انٹرویو میں کہا کہ طیارہ بردار جہاز نے نہر سویز کو عبور کیا اور بحیرہ عرب کی طرف پیش قدمی کی۔
وہ اس وقت اپنے مقام پر موجود ہے لیکن وہ آبنائے ہرمز میں نہیں ہے۔انہوں نے مزید کہا کہ شروع ہی سے، فرانس کا موقف آبنائے ہرمز میں جہاز رانی کی آزادی کو بحال کرنے کے امکان کو پیش کرنا رہا ہے لیکن غیر جارحانہ انداز میں بلکہ خالصتا دفاعی انداز میں اور بین الاقوامی قانون کا احترام کرتے ہوئے۔اس طیارہ بردار بحری جہاز نے چھ مئی کو نہر سویز کو عبور کیا تھا اور چند روز کے لیے جیبوتی میں رکا تھا جہاں فرانس کا بحری اڈہ قائم ہے۔ وزیر دفاع نے کہا کہ خلیجی علاقے میں فرانسیسی طیارہ بردار جہاز کی موجودگی ہمیں صورتحال کا جائزہ لینے اور علاقائی و عالمی سفارتی مساوات پر اثر انداز ہونے کا موقع فراہم کرتی ہے۔ برطانیہ اور فرانس نے گزشتہ ماہ ہرمز کو محفوظ بنانے کے لیے ایک فوجی منصوبے کی تشکیل کا اعلان کیا تھا جس سے وہاں تجارتی جہاز رانی کی آمد و رفت کو دوبارہ شروع کرنا ممکن ہو سکے گا۔
رپورٹس کے مطابق تقریبا 40 ملکوں نے اس اہم آبی گزرگاہ میں جہاز رانی کے تحفظ کے لیے دونوں ملکوں کی قیادت میں ایک کثیر ملکی مشن میں حصہ لینے پر رضامندی ظاہر کی ہے۔ یہ اس وقت ہوگا جیسے ہی ایران اور امریکہ اس کا محاصرہ ختم کرنے پر راضی ہو جائیں گے۔اس سٹریٹجک آبنائے کی بندش تیل اور گیس کی برآمدات میں رکاوٹ بن رہی ہے اور ان کی قیمتوں کو بڑھاتی ہے۔ اس بندش سے عالمی معیشت متاثر ہوتی ہے۔
