لاہور (شوبز ڈیسک)پنجاب میں بارشوں کے بعد لاہور کے ڈی ایچ اے میں بھی گھٹنوں گھٹنوں پانی کھڑا ہوگیا۔ رابی پیرزادہ نے بھی اپنے گھر کے قریب کھڑے پانی کی ویڈیو بناتے ہوئے وزیراعلی پنجاب مریم نواز سے شکوہ کر ڈالا۔رابی پیرزادہ نے اپنے فیس بک پیج پر بارش کے بعد کھڑے ہوئے پانی کی ایک ویڈیو شیئر کی ہے جس کا کیپشن بارش کے بعد لاہور کی صورت حال اور مریم نواز کا ستھرا پنجاب دیا ہے۔
اور ویڈیو پر لکھا ہے مریم نواز صاحبہ، دیکھیں لاہور کے ساتھ کیا ہورہا ہے۔رابی پیرزادہ نے وزیراعلی پنجاب کو مخاطب کرتے ہوئے کہا مریم نواز صاحبہ! یہ میں اپنے گھر میں کھڑی ہوں، جو کہ لاہور کے مہنگے ترین علاقے میں آتا ہے، یہ ڈی ایچ اے فیز ون ہے۔
میرے آفس ، میرے اسکول کے اندر بہت نقصان ہوا ہے۔رابی پیرزادہ نے ویڈیو کے کمنٹس میں لکھا یہ ویڈیو ڈی ایچ اے میں ضرور ریکارڈ ہوئی ہے، مگر بارش کے بعد تقریبا پورے لاہور کا یہی حال ہے۔ اس ویڈیو کا مقصد کسی مخصوص علاقے یا ادارے پر تنقید کرنا نہیں، بلکہ اربابِ اختیار تک عوام کی مشکلات پہنچانا ہے تاکہ بروقت اور موثر اقدامات کیے جا سکیں۔رابی پیرزادہ کی یہ ویڈیو سوشل میڈیا پر وائرل ہوگئی۔ تاہم کئی صارفین نے کمنٹ کیا کہ شدید بارش کے بعد پانی کا کھڑا ہونا عام بات ہے، جو کہ فوری نہیں نکالا جاسکتا۔ لیکن چند گھنٹوں بعد پانی کی نکاسی کردی گئی۔
