لاہور(کورٹ نیوز)لاہور ہائیکورٹ نے پاکستان تحریک انصاف کی 5 اگست کو مینار پاکستان پر جلسے کی اجازت کی درخواست مسترد کر دی۔پی ٹی آئی کی 5 اگست کو مینار پاکستان پر جلسہ کرنے کی اجازت سے متعلق درخواست پر سماعت لاہور ہائیکورٹ میں ہوئی۔ پی ٹی آئی رہنما میاں عثمان اکرم کی درخواست پر سماعت جسٹس مرزا وقاص رﺅف نے کی۔
دوران سماعت سرکاری وکیل نے عدالت کو بتایا کہ مینار پاکستان پر جلسے کی پی ٹی آئی کی درخواست خارج کردی گئی ہے، جس پر پی ٹی آئی کے وکیل نے کہا کہ ہمیں جلسے کےلئے متبادل جگہ فراہم کر دیں۔
عدالت نے سرکاری وکیل کو ڈپٹی کمشنر سے فوری ہدایت لیکر عدالت کو آگاہ کرنے کا حکم دیا اور کہا ڈپٹی کمشنر سے پوچھیں کہ کیا مینار پاکستان کے سوا کسی جگہ جلسے کی اجازت دے سکتے ہیں؟ ۔بعد ازاں لاہور ہائیکورٹ کے جسٹس مرزا وقاص رﺅف نے پی ٹی آئی کی درخواست غیر ضروری قرار دیتے ہوئے مسترد کر دی اور کہا کہ عدالت نے قانون کے مطابق فیصلہ کرنا ہے، جلسے سے متعلق درخواست پر ڈی سی نے فیصلہ کر دیا ہے۔
